Etiketa: erronkak

2030: urrunegi, ala… gertuegi?

Posted on by markel

Norberaren bizitzan hogei urteko ibilbidea historia luze xamarra dela esan genezake, baina gizartearen garapenean edota lurralde baten eraldaketari dagokionean begi gora-behera batean igaro daiteken aldiunea dugu.

Gaurkoan, Aldundiaren Estrategia Bulegoak Gipuzkoako etorkizuna prestatzeko estrategia-oinarriak aurkeztu ditu Kursaal-en. Bertan, 2030 urtera begira proiektatutako irizpideak izan ditugu aztergai eta ikusmuga urrunegia badirudi ere, ordurako Gipuzkoaren etorkizuna egoki landu nahi badugu, lanari eutsi behar zaiola ondorioztatu da.

Etorkizuna prestatzerakoan iragana eta oraina kontutan hartzea ezinbestekoa da, eta funtsezkoa guztion parte hartzea. Hauxe izan da bertan azaldu dudan hausnarketa.

Galdera, 2030 urrunegi ala gertuegi?

Enpresen egoera ezagutzen

Posted on by markel

Uda iritsi, aste berria hasi eta ekimen berri bati ekin diogu. Aurten martxan jarri dugun krisiaren aurkako planaren diseinuan orduak eta orduak eman ditugu, lurraldearen egoera aztertzen eta enpresen zailtasunak arintzeko formulen bila. Asteak eman ditugu Plan beraren laguntza lerroen nondik norakoak zehazten eta, deialdiak egin eta erabaki ondoren, Aldundiak lagunduko dituen 182 proiektuak zuzenean ezagutzeko bidea zabaldu genuen atzo. Guztiak banan bana ukitzeko aukera zaila bada ere, zenbaki horren atzean ezkutatzen den errealitatera hurbiltzeko asmoa dugu.

Atzo Oarsoaldea inguruko bi enpresen ateak zeharkatu genituen Jose Ramon Guridik eta biok: Oiartzungo Salto Systems eta Pasaia inguruko Likuid Nanotek. Biak egitasmo gazteak eta proiekzio handikoak. Saltoren kasuan, adibidez, harro sentitu nintzen bertako sarrailak mundu osoan ezarrita dauden produktuak direla entzun nuenean. Bertan sortzen eta ekoizten diren produktuak Heathrow aireportuko 5. terminalean edo Frantziako Assamblée Nationalean ikus ditzakegu.

Egia da hori ez dugula berria, aspaldi baitabiltza gure enpresak euren produktua nazioarteratzen, baina garai zail eta konplexu honetan enpresen ausardia eta kemena gertutik sumatzen dituzunean, halako poz berezia pizten zaizu Aldundiak bultzatutako laguntza ekimenak eraginkorrak izan direla entzuterakoan.